" ربنا مايرضاش بالظلم ... "

( 1 ) استوقفتني سيدة صغيرة تحمل رضيعها وسألتني " مش انتي .... " وافقتها " اعطلك دقيقة ، اسألك في حاجه كدة" وضحت لي انها طلقت من رجل عابث بعد زواج قصير وانها "رجعت بيت ابويا بعد كذا شهر والعيل ده علي كتفي " امسكت ذراعي كأنها تستنجد بي " هو صحيح لو اتجوزت يسقط حقي في الحضانة وياخدوا ابني مني ؟؟!!" ادركت سبب حيرتها " يعني اتجوز كذا شهر راجل مالوش لازمة ، يطلقني غصب عني ويتخلي عني انا وابنه ، واخرتها ، لو فكرت اتجوز تاني ، يروح المحكمة ياخد الواد مني ؟؟!!" شرحت لها " لا ساعتها والدتك اللي تاخده " لوحت لي بيدها غاضبه لايعجبها حديثي " والدتي ايه وبتاع ايه ، هي امي بعد ماربت وكبرت ، حترجع تاني تعيده من الاول ، طب ووالدتي ليه ، ماانا هو نفسي موت الواد يفضل في حضني " انحنت علي رضيعها تقبله بحنان وسألتني " هو القانون مش عايزيني اتجوز تاني ليه ؟؟!! اما يعني اعمل ايه ؟؟" ابحث عن كلمات منمقة ارد بها علي اسئلتها الصعبة ، انفجرت في البكاء غاضبه حزينة " معلش فهميني ، يعني يااقعد كل عمري من غير جواز ، ياانسي الواد ده ويعوض عليا ربنا " حاولت اهون عليها " لا ، انتي ساعتها تقدري تشوفيه !! " رمقتني بنظره غضب " ياقعد اربي الواد وشبابي يضيع ، ياتجوز والواد هو اللي يضيع مني !!" تحجرت مقلتيها غضبا " ليه ؟؟ ده القانون بيعاقبني بقي ، بيعاقبني اني اتطلقت غصب عني وبيعاقبني لو فكرت اتجوز واعدل بختي المايل ، القانون عايزيني اقعد كده زي البيت الوقف " لوحت لي بيديها مودعة " اكيد يااستاذة فيه حاجة غلط ، ده العيل ده مايلاقيش احن مني عليه ، مايلاقيش اللي يحبه قدي ولا اللي يستحمله قدي ، معقوله ياخدوه مني لو اتجوزت ، ده ظلم وربنا مايرضاش بالظلم !!" واحتضنت رضيعها وتركتني وحيدة مكاني تتردد كلماتها في اذني " ده ظلم وربنا مايرضاِش بالظلم !!!!"
( 2 ) دخل مكتبي رجل غاضب محتقن الوجه تحسه يكاد ينفجر ، رمي جسده علي المقعد امامي وصرخ " ابني الوحيد اشوفه والناس بتجري ورايا !!" لم افهم ، صرخ بصوت اعلي " اشوفه مرة في الاسبوع ، الناس ، قصدي امه وجده وجدته وبتوع الامن والناس الغرب ، ماانتي فاهمة بقي " قاطعته " لا مش فاهمة !!" شرح لي بصوت مرتعش " هو الاب فلوس وبس ، هو الاب هات وهات ، مااخدش الولد افسحه ، مااروحش انا وهو مشوار ، ابني الوحيد اشوفه في النادي ساعتين في الاسبوع ، دفتر وامضا وقرف " حاولت تهدئته " ماهو القانون بيقول ... " قاطعني " قانون ايه وبتاع ايه ، القانون قال اني اشوف ابني بالطريقة دي وسط الناس الغرب ، اكلمه والناس كلها سمعاني ، امه مركزه معانا وبتوع الامن بيسجلوا كل كلمه علينا ، معقوله هو ده القانون ؟!" شرح لي وهو يرتعش " رفعت قضية خلع واتخلعت ، براحتها ومع السلامة لكن ابني هو كمان اتخلع مني ، تتخلع وتاخد الواد يعيش معاها ، ماشي ، لكن اشوفه تلات ساعات كل اسبوع وفي الشارع " قاطعته " الشارع ؟!" ضحك ضحكه مريرة " ايوة الشارع ، هو النادي والا الجنينه اللي اتحكم عليا اشوفه فيها دي ايه ، ماهي شارع ، ناس رايحه وناس جاية وانا قاعد انا وابني متوترين ، الواد مرعوب من امه وانا عايز اموتها والمسئولين في النادي خايفين من المسئولية " نظر لي باسي " الولد اللي بيدفع تمن ده كله ، علاقته بيا بايظة وحتفضل بايظة ، هو ده اللي عايزه القانون !!! يطلع الولد مايعرفنيش ، انا بابا بتاع الرؤية والنفقة والقرف !! " حاولت اهون عليه "ماهو فيه رجاله حاولت تخطف عيالها ، علشان كده القانون حدد ضمانات .... " قاطعني " طب واحنا ذنبنا ايه ، واحد مجرم غلط ، نتعاقب احنا كلنا بجريمته ليه ؟؟!!" همس وهو يحاول السيطرة علي اعصابه " يااستاذة ، لازم نلاقي حل للوضع ده ، جايز انا زوج وحش ، لكن نفسي ابقي اب كويس لابني ، اخده يصلي الجمعه معايا ، اتمشي انا وهو في الشارع ، نسافر نصيف ، نلعب كورة ، يعيد معايا ، يوم اخده يلعب مع ولاد العيلة ، مرة نروح الهرم ، ومرة اخده البلد عند اهلي الفلاحين ، وصدقيني حارجعه لامه ومش حاخطفه !! " هززت رأسي اوافقه "انا مصدقاك ، المهم القانون هو اللي يصدقك !!" قام من مكانه وهو اكثر غضبا " هما اللي عملوا القوانين دي ماعندهمش عيال ، مايعرفوش احنا بنعاني قد ايه ، ولا القانون عايزني انسي الواد واروح اعيش حياتي واخرتها الناس تلومني وتقول اب ندل " حاولت تهدئته " الولد مالوش ذنب ، ده عيل صغير " القي بجسده ثانيه علي المقعد كأنه يصارع الاشباح " ماهو ده اللي باقوله ان الولد مالوش ذنب .. بس انا كمان ماليش ذنب !!!" نظر لي نظره اعرف نتائجها جيدا " عايز اكون اب حقيقي لابني ، صعب القانون يفهم الكلام ده ، خلاص بقي مابدهاش ، القانون عايزني اصور قتيل ، حاضر " وتركني وبقيت في مكاني جامدة لااعرف ماذا افعل انتظرعودته يعاني من مشكله اكبر واكثر تعقيدا!!!
( 3 ) اقترب مني رجل اشيب وانا جالسه انتظر قضيتي وسألني " مين احن علي العيل ، مرات ابوه ولا جوز امه " لم افهم سؤاله ، شرح لي " بنتي اتطلقت من الزمانات ،اتكفت علي عيالها سنين واخرتها اتجوزت ، حقها مش كدة؟؟!! " تنهد بحزن " ابو العيال اتجوز هو راخر من الزمانات ، العيال هي اللي ضاعت راحوا قعدوا مع مرات ابوهم بهدلتهم ،جينا النهارده هنا ، عايزين الولاد يعيشوا مع امهم وجوزها ، الراجل طيب وابن ناس وبيحب العيال جدا ، الاستاذ بتاعنا بيقول ان القضية خسرانه وان العيال ماينفعش يعيشوا مع امهم وجوزها ، الا صحيح؟؟!! " حاولت اشرح له القانون لم يعجبه كلامي " يااستاذة ، ايه الكلام ده ، الست هي اللي بتربي ، هي اللي بتقعد مع العيال في البيت طول النهار ، والرجاله في شغلها ، بقي العيال تقعد مع مرات ابوهم اللي مش طايقاهم والا تقعد مع امهم اللي بتشتهي خيالهم ، يبقي ليه بقي قضيتها خسرانه ؟؟" اقتربت ابنته تناديه " يالا ياحاج قضيتنا قربت ، انا حاشرح للقاضي اني اولي بعيالي من مرات ابوهم وان جوزي راجل طيب ومرات ابوهم عقربة ، حاقوله يجيب العيال يسمعهم ويشوف هما عايزين ايه " قام الرجل من مكانه بخطوات بطيئة وهو يشرح لها " ماشي كل اللي انت عايزه تقوليه قوليه ، بس والنبي لو خسرتي القضيه ما تتقهري !! " نظرت له نظرة غضب لاتقبل حديثه "اخسرها ليه ، ده انا ام العيال واولي بيهم والا هو القانون قاصد يعذب العيال ويعذبني ؟؟!! " وبقيت مكاني انتظر قضيتي اردد كلماتها " الا هو القانون قاصد يعذب العيال ويعذبني ؟؟!! "
( 4 ) اتصل بي من خارج مصر يطلب ميعاد " اصل انا نازل اجازه قصيره ومحتاج استشاره ضروري " قابلته في الميعاد " انا وزوجتي متطلقين من زمان ، انا بشتغل بره مصر ، باجي اجازه مرتين في السنه ، بابقي عايز اشوف الولاد واقعد معاهم ، حاولت معاها بالود مافيش فايدة ، كرهاني وعنيدة وكل همها الولاد يكرهوني " سألته " فين المشكلة ؟؟ " شرح لي " انا معايا حكم رؤية ، مرة كل اسبوع تلات ساعات ، اوكي ، لو انا قاعد في مصر مافيش مشكلة ، لكن انا مسافر طول الوقت ، ولما باجي اجازه قصيرة الحكم مايكفيش وماينفعش " اسهب في شرح مشكلته " بقي اغيب عن الولاد سته شهور ولما اجي اجازه اسبوعين اشوفهم مرتين بس واسافر تاني ، حاولت اوصل معاها لاي حل ودي ، دخلت الاقارب والاصدقاء ، كل طلبي ان فترة اجازتي يقضوها معايا وبقيه السنه معاها ، رفضت وقالت لهم اللي يعرف ياخده بالمحكمة ياخده ، رحت المحكمة ، قالوا مافيش فايدة ، الرؤية مرة كل اسبوع تلات ساعات ، حاولت اشرح ظروفي الخاصه واني باسافر وارجع محدش سمعني ، ياتري مشكلتي دي ليها حل ؟؟ " هززت رأسي نفيا ، قام من مكانه وشكرني وهو يهز رأسه تعجبا " هما اللي عاملين القانون ده عايشين فين ؟؟ في المريخ ؟؟ ليه مش فاهمين مشاكلنا الحقيقية ، ليه مش عارفين يقدروا ظروفنا ،انا طلبي بسيط ، لماانزل اجازه اشوف ولادي براحتي ، طلب صعب ده ومستحيل تحقيقه؟؟!!!" شكرني وتركني حزينه احس عجزا رهيبا عن تحقيق طلبه البسيط الذي لايفهمه القانون !!!! الفقرة الاخيرة – ان قوانين الاحوال الشخصية تحتاج لمجموعه من المبدعين اصحاب القلوب الرقيقة والنفوس الحانية والعقول الكبيرة والخبرات الواقعية ، يفكروا في استحداث حلول حقيقية للمشاكل الواقعية للناس والا ستزداد الصراعات وتنتشر مشاعر الكراهية والغضب وهو امر لن ندرك عواقبه المجتمعية الحالية والمستقبلية الا بعد فوات الاوان ... الجملة الاخيرة – صرخت في الفضاء حتي بح صوتي اناشد المطلقين " لاتجعلوا الاطفال ساحة حروبكم فهم ابرياء بلا ذنب " .... هل يسمعني احد ؟؟؟!!!! الكلمة الاخيرة – في داخل محكمة الاسرة ومحاكم الاحوال الشخصية لاتري الا الدموع ولاتسمع الا الصراخ ولاتشعر الا بالمرارة والعجز .. يالها من مأساة !!!